Баерн (М) сигурен во дербито против Херта Баварците ја совладаа Херта на „Алианц арена" со 4:2,
а тимот од Бремен го декласира Бохум со 6:0
Баварците не дозволија изненадување на „Алианц арена": Лусио
Пресметката во Минхен меѓу Баерн и Херта и немилосрдноста на Вердер на
гостувањето кај Бохум беа дуелите кои го привлекоа вниманието во седмото коло од
германскиот фудбалски шампионат. Баварците славеа со 4:2 во дербито на „Алианц"
арената против „берлинската дама" во меч во кој четата на Магат по само 15
минути игра обезбеди предност од 2:0. Резултатот го отвори Макај во деветтата
минута, а шест минути подоцна Сањол само подметна нога за вториот погодок за
Баерн. Домашните подобро стартуваа и во второто полувреме и преку Пизаро поведоа
со 3:0. И кога се чинеше дека гостите од Берлин ќе доживеат дебакл во Минхен со
головите на Фати и Пантелиќ Херта се враќа во „живот", но секаква неизвесност
спречи Подолски во 78 минута за конечните 4:2.
Иако се одиграни само
седум кола во Германија, една работа е прилично сигурна и извесна, Бохум тешко
дека ќе може да ја прекине својата традиција на експресно испаѓање од лигата.
Повратникот во Бундеслигата сезонава, викендот доживеа бламажа и тоа на
сопствениот тревник. Во Бохум гостуваше Вердер и притоа славеше со 6:0. Хунт го
доведе тимот од Бремен во водство од 1:0, а во продолжението домашните доживеаја
вистински потоп кога голманот Сков-Јенсен уште пет пати беше принуден да ја вади
топката од сопствената мрежа. Интересно е што во листата на стрелци се запишаа
шест различни фудбалери, па на Хунт му се придружија Шулц, Врањеш, Диего, Фриц и
Налдо.
Во малото дерби на колото на „АОЛ" арената во Хамбург силите ги
одмерија Хамбургер и Шалке 04, а тимот од Гелзенкирхен славеше со 2:1. Творци на
триумфот за гостите беа Халил Алтинтоп и Бордон, единствениот гол за домашните
беше дело на Пјотр Троховски. Штутгарт со убедливи 3:0 го порази Баер (Л),
Ајнтрахт на нашиот Васоски ремизираше кај Хановер, а Борусија (М) го совлада
Волфсбург со 3:1. Мајнц 05, во чии редови го немаше македонскиот репрезентативец
Николче Новески, во петокот загуби на домашен терен од Алеманија Ахен со 3:1,
додека Енерџи Котбус на Игор Митрески вчера попладне ја пречека Борусија (Д).
