Бучковски се сретна со Меркел на Мундијалот Премиерот Бучковски како гостин на отворањето на Мундијалот во Минхен се сретна со германската канцеларка Ангела Меркел и со германскиот претседател Хорст Келер, соопшти Кабинетот на претседателот на Владата на Република Македонија.
Меркел му ја пренела на Бучковски пораката дека Германија ги поддржува европските перспективи на Република Македонија.
По покана на Меркел, Бучковски во Минхен присуствуваше на свеченото отворање на Светското првенство во фудбал, заедно со повеќе претседатели на држави и влади.
Придружуван од својот советник Теодор Вајгел, премиерот Бучковски имал и други средби со влијателни германски политичари. (МИА)
Средба Владата ќе помогне во одбраната на Бошкоски Владата официјално ја потврди волјата да помогне во одбраната на ексминистерот Љубе Бошкоски, на кого му се суди во Хаг. Овој став Владата го потврди со соопштение по завчерашната средба на премиерот Бучковски со адвокатката на Бошкоски, Едина Рашидовиќ. Таа се сретна и со министерката за правда, Мери Младеновска-Ѓорѓиевска. По средбата, Рашидовиќ изјави дека Владата е расположена да помогне во одбраната на Бошкоски, но разговорите продолжуваат. Во соопштението од Владата не се прецизира дали договорот за помош на Бошкоски ќе биде финализиран наскоро. (Д.Р.)
Извештај Груевски во Струмица Лидерот на ВМРО-ДПМНЕ, Никола Груевски, во Струмица рече дека аграрот за Македонија е најголема зелена фабрика и оти заслужува повеќе внимание. „СДСМ целосно го уништи македонското земјоделство, а чесните македонски земјоделски производители ги донесе на питачки стап. Кога ќе дојдеме на власт, најпрво ќе се заложиме за враќање на стапката на ДДВ во оваа област од 18 на 5 отсто“, рече Груевски. Идејата е, како што рече, македонските земјоделци да набавуваат поевтино семе и вештачки ѓубриња. (МИА)
